السلام عليكم وكل عام وانتم بخير
جبتلكم شوية افكار ونصائح علشان نحافظ على صحتنا فى الصيام
النصيحة الأولى
الإفطار على التمر
ياريت إنك تبدئي فطارك على "تمرة أو تمرتين" سواء تمر منقوع "خشاف" أو تمر جاف، وعلى فكرة الإفطار على التمر بالإضافة إلى إنه سنة عن النبي -صلى الله عليه وسلم- فهو مفيد كمان للجسم، وده لأن كل تمرتين بيعادلوا مقدار ثمرة فاكهة زي البرتقال أو التفاح أو نصف موزة.
النصيحة التانية
المشروبات
ابعدي أي عصير مثلج أو مية مثلجة عن السفرة في الإفطار، وده لأن أي حاجة مثلجة بتتعب المعدة قوي خاصة بعد الصيام، ولو عايزة تشربي أي عصير أو مية ياريت إنها تكون درجة حرارتها عادية يعني "مية من الحنفية".
كمان ياريت تكون العصائر دي فريش وإنتِ عاملاها في البيت زي عصير قمر الدين أو عصير البرتقال وياريت إنك تعملي العصير قبل الإفطار بوقت قصير علشان مايفقدش الفيتامينات الموجودة فيه...
كمان خدي بالك إنك ماتكتريش من شرب المية والعصائر أثناء تناول الإفطار لأنها بتؤدي إلى امتلاء المعدة على الفاضي والشعور بالشبع الكاذب.
كمان ياريت إنك ماتكتريش من المواد السكرية زي "العصائر" على الإفطار لأن الإكثار منها يسبب تقليل العصارات الهاضمة للطعام وبالتالي ممكن تشعري بحدوث سوء هضم وإنك دايخة..
وعلى فكرة يا جماعة مش معنى كلامي ده إننا نمنع شرب العصائر أو المية على الإفطار، لأ اشربي بس بالعقل يعني كفاية كوباية عصير واحدة وكوب ماء واحد على الإفطار، وماتكرتيش أكتر من كده.
وفي الفترة ما بين الإفطار والسحور ممكن تشربي عصائر ومية زي ما إنت عايزة علشان تعوضي فترة الصيام..
حاجة أخيرة وهي بالنسبة للشاي فياريت إنك تشربيه بعد الإفطار بحوالي ساعتين، وده لأن شرب الشاي بعد الأكل على طول بيخلي الجسم مايستفيدش بأي حاجة من الغذاء، وده لأن الشاي فيه مادة بتحرق الفيتامينات اللي في الأكل.
النصيحة الثالثة
الخضار
لازم ولابد من تناول الخضار بشكل منتظم في شهر رمضان وماينفعش إنك تقولي إنك مش بتحبي الخضار، لأ لازم تحبيه وتاكليه لأنه مفيد جدا للجسم في شهر رمضان لاحتوائه على الفيتامينات والمعادن والألياف والأملاح المعدنية المفيدة للجسم والبشرة، واللي بتعوض الجسم عن الحاجات اللي بيفقدها من صيام طول اليوم.
وممكن إنك تتناولي الخضار ده في شكل طبق السلطة الخضراء اللي لازم يكون موجود على سفرة في رمضان كل يوم، وخدي بالك إن طبق السلطة ده بالإضافة إلى إنه بيحتوي على الكثير من العناصر الغذائية ده بيفتح نفسك على الأكل وبيساعدك على هضم الطعام بسرعة، وينصح بإضافة عصير نصف ليمونة على طبق السلطة ومعلقة زيت الزيتون لأنه من أفضل أنواع الزيوت وبيساعد على الهضم.
كمان ياريت إنك تبعدي نهائيا عن الأكل المسبك في رمضان -خاصة كمان إن رمضان السنة دي جاي في الصيف- وده لأن الأكلات المسبكة بتكون تقيلة على المعدة وصعبة الهضم وبتؤذي الكبد وترهقه...
وياريت كمان إنك تعملي كل يوم طبق شوربة خضار لأنها مفيدة جدا وبتمد الجسم بالفيتامينات وسهلة الهضم ومن المقبلات اللي بتفتح النفس على الأكل.
النصيحة الرابعة
لا للوجبات الحارة
ابعدي عن تناول الوجبات الحارة اللي بتحتوي علي كمية كبيرة من التوابل والبهارات زي "الفلفل الأسود" و"الشطة"، وده لأن الأكلات دي بتكون صعبة الهضم وبتتعب المعدة في رمضان، ده بالإضافة إلى إنها هتخليكِ تشربي مية لغاية السحور، الأمر اللي قد يسبب الإصابة بسوء هضم، وممكن إنها تخليكِ تشعري تاني يوم بالعطش الشديد. كمان ياريت إنك تقللي من المخللات.
النصيحة الخامسة
بالنسبة للحوم والأسماك
ويفضل إن اللحوم والطيور أو الأسماك تكون مشوية أو مسلوقة وابعدي عن المحمرة لأنها صعبة الهضم، وينصح إنها تكون منزوعة الجلد خاصة بالنسبة للفراخ.
وعلى فكرة ممكن إنك تعملي توازن في غذائك، يعني في الأسبوع ممكن إنك تاكلي يومين أو تلات أيام سمك وباقي أيام الأسبوع تكون ما بين فراخ أو لحمة...
النصيحة السادسة
بالنسبة للفاكهة
ياريت إنك بعد الإفطار بحوالي ساعة تاكلي فاكهة من أي نوع فاكهة متاحة ليكِ، زي البرتقال أو اليوسفي أو الرمان أو الجوافة أو البطيخ أو الكمثري، على فكرة تناول الفواكه مفيد جدا في رمضان لتجنب حدوث الإمساك خاصة الفاكهة اللي بتحتوي على نسبة عالية من الألياف.
النصيحة السابعة
بالنسبة للحلويات
أنا عارفة إن كلنا بلا استثناء مانقدرش إننا نمسك نفسنا قدام صينية كنافة أو طبق قطايف أو غيرها من حلويات شهر رمضان، علشان كده هاقول لك كلي حلويات بعد تناول الإفطار بحوالي ساعتين، بس ماتكتريش.. كمان ماتكليش حلويات بعد السحور لأنها هتخليكِ تشعري بالجوع والعطش في اليوم التالي..
النصحية الثامنة
النشويات
طبعا أكيد إن جسمك بيكون محتاج إلى النشويات؛ علشان كده ممكن إنك تاكلي نشويات زي الأرز أو المكرونة أو العيش الأسمر البلدي، بس برضه بحساب، خاصة لو كنتِ من الناس اللي بتعاني من زيادة في الوزن
ا لنصيحة التاسعة
ا لألبان
بتعتبر الألبان من أهم مصادر البروتين اليومي اللي بيمد الجسم بالكالسيوم؛ علشان كده ياريت إنك تشربي كل يوم كوب لبن كبير أثناء السحور ولو مش بتحبي اللبن ممكن إنك تاخدي أي شيء من مشتقات الألبان، يعني في السحور على سبيل المثال ممكن إنك تاكلي كوب زبادي أو اللبن الرائب أو جبنة قريش، أو بين الإفطار والسحور ممكن إنك تاكلي طبق رز بلبن أو أم علي، يعني من الآخر احرصي إنك تاخدي أي حاجة فيها لبن.
وفي النهاية أحب أقول لك إنك لو مشيتِ على النصائح دي صدقيني هتخرجي من رمضان وإنتِ في كامل صحتك ولياقتك البدنية، ومش هتشعري بأي ألم أو تعب، وأكيد هينعكس غذاؤك على بشرتك كمان، لأن زي ما إنتِ عارفة إن الغذاء بيؤثر على البشرة والغذاء الصحي المفيد بيؤدي إلى نضارة البشرة.
بس كده خلاص خلصت
الجمعة يناير 04, 2008 4:06 am
